Heb 2 | DOB | STEP | 'Enega 'ilobweneda be ona nidi tanonodiya tanuwa'i'isidi, ta geya'abo tanuwanuwa pupuledi.

Hebrews 2

'Etoseyana nina Yaubada 'enega

1 'Enega 'ilobweneda be ona nidi tanonodiya tanuwa'i'isidi, ta geya'abo tanuwanuwa pupuledi.

2 Lowa aniloseyao Yaubada 'ina ona sisimanena tomota 'ediya, ta ona nina ona 'ai'aila, 'enega 'abo tomota nigeya simulimuliye 'idi to'umalinao 'ebweuna 'ebweuna 'ana e'isa siloba. 3 'Abo'ada wate 'abo 'etoseyana nina sinabwana taguitoyasei, bwa'omatana taloba, ta nigeya kapekapeyana tadedena 'enega.

Ona nina 'etoseyana manuna 'ida 'Inapwana Yesu 'igimisimana apwesena, 'enega 'ina onao 'ana togimi nonoyao 'abo'ada si'ebwa'eda.

4 Ta Yaubada wate 'ie'ita 'aene ona nina ona 'ai'aila, nate we'iwe'iyaya be edeedede be guinuwa waiwaidi 'ediyega, ta wate Yaluyaluwa Tabuna 'ina eguyai 'edaya 'enega. Ta 'ina 'ebwaya nidi Yaubada 'ina nuwanuwa nadigega, ga Yaluyaluwa Tabuna yage nidi 'edaya 'ieguyaiyedi.

'Ada To'etoseyana 'ina 'elouya manuda

5 Ni'atu 'aeonemi sena nina 'etamo talobai manuna, ta Yaubada aniloseyao geya'abo 'idi loina 'i'ebwa'ebwa'edi sena nina 'enaya, 6 ta esi tomota 'ebweu 'i'ebwa'ena, manuna Buki Tabu 'ena 'isimanena, 'igwae,

“Yaubada ye, to tomota tauna be 'enega manuna 'unuwanuwa? Ta yaita sana tauna tomota natuna ga 'u'ita'ita'i'isi? 7 'Enega tuta kukupana namo manuna 'usa'u ebusiyena, aniloseyao 'agulaudiya, ta muliyega 'ana 'amayaba be 'ana tupu sinabwana 'u'ebwa'ena. 8 Ta waiwai wate 'u'ebwa'ena be yage maibo'adi 'iloinedi.”

Ta 'ina 'ebeloina yage maibo'ana manuna. Ta nigeya gete tuga, ta ma'etamo esi be yage maibo'adi 'ediya 'ida loina. 9 Ta Yesu esi ni'atu ta'itena, 'aene tuta kukupana namo 'ena 'imiyaebusi aniloseyao 'ubunidiya, ta muliyega 'ana 'amayaba be 'ana tupu sinabwana 'ilobedi 'ina 'elouya be 'ina mwawasa 'ediyega. Nate Yaubada 'ina oboboma 'edaya, manuna Yesu mwawasa 'ana 'elouya 'ilotoona maibo'ada manuda.

10 Yaubada yage maibo'adi 'imweluluidi tauna manuna, 'enega nuwanuwana natunao yauyaudi 'i'au'ewedima tauna 'ina sena esaesa 'enaya, ta 'ilobwenena be Yaubada nina 'ada To'etoseyana 'ida gie'esase, manuna 'elouya sinabwana 'ilotoona, ta tuwa tuga 'ie'alama'i'ita, ga 'enega 'ina bubuna maibo'ana 'esasena.

11 Yesu nina 'ada To'etoseyana ga 'abo'ada wate 'igie'esaseda, ta tauna be 'abo'ada Yaubada 'enega tamai, 'enega geya'abo Yesu 'iomayamaya manuda, ta esi 'i'awa'awa tasineda, 12 manuna 'ina ona Tamana 'enaya, 'igwae,

“'Amu esana yada simane tasigwao 'ediya, be deliegogona solanaya yatupuyo.”

13 Ta wate 'igwae,

“Tauna 'ena 'igu emisa yasa'u.”

Ta wate 'igwae,

“Gogama nidi Yaubada 'i'ebwa'eguya ni'atu ma'egwao 'amiyami.”

14 Ona'ai'aila, Yesu 'ina gogamao 'abo'ada tomota maesiyoda be malalada, 'enega Yesu wate 'ietomotai ga tomota oona 'i'ewena ga 'imwawasa, be 'aene 'ina mwawasega Seitani 'iloesawali, be Seitani 'ina loina mwawasa manuna wate 'iloesawali. 15 Ta mwawasa 'ana matauta be 'ina yona waiwaina 'ida tuta maibo'ana 'ediyega 'i'etoseyeda.

16 'Etoseyana nina nigeya aniloseyao manudi ta esi 'abo'ada Ebelaamo tubunao manuda. 17 'Enega Yesu 'ietomotai 'abo'ada tasinao nadigega, ga 'ietotaliya sinabwana ma ina 'atenuwa'ole'ole manuda, ga Yaubada 'ina guinuwa 'ena 'ietapewa, ta 'italiya 'ida bubuna to'umalidi manudi be 'aene Yaubada 'ida nuwataudi.

18 Ona'ai'aila, Yesu bale'uya miyamwau ta 'ebetoo yauna 'ilobedi, 'enega 'abo Seitani 'itooda, Yesu ni'atu 'ebetoo nidi 'imwalamwalatonidi, be kapekapeyana 'ediyega 'i'etoseyeda.v10 Ib 5:8-9v11 Mk 3:35v12 Sam 22:22v13 Ais 8:17-18v14 1 Yn 3:8v17-18 Ib 4:15; Md 4:1-11